多謝各位鍾意小弟嘅「啤酒理論」，小弟會繼續努力！市升同回，鬼知咩？不過指數股不易高追，等到回調再「㩒掣出手」，好似建行（00939），個個都話貴，其他Big 3都追唔上佢嘅走勢，不如留意吓其他三兄弟仲好！投資一定要堅定信念，尋根究柢，唔好人講你又驚，如果唔係就做咗人哋投資上嘅傀儡，幾唔抵！
繼續新股IPO，今日睇到隻熔盛（01101），將佢嘅重點同大家分享。首先，中國造船業的市場領導者熔盛係中國第二大造船企業同中國最大民營造船企業，擁有中國最大船廠；截至一○年八月一日，超大型礦砂船定單（按載重噸計）佔全球30萬載重噸以上超大型礦砂船定單總額約25.4%，全球排名第一，係生產30萬載重噸以上超大型礦砂船方面嘅全球市場領導者。
其次，動力工程和海洋工程業務迅速增長，熔盛係少數可以建造海洋工程產品嘅民營公司之一，建築緊嘅第四座乾船塢係目前喺中國獲國家發改委批准用喺海洋工程項目嘅最大型乾船塢，而且已經同中國海洋石油總公司訂立合約建造具備3,000米鋪管深度嘅深水鋪管起重船；熔盛係唯一一間獲國家發改委批准建造低速船用柴油發動機嘅民營企業，喺建成後具備全國最大產能；已得到國家發改委批准建造船用低速柴油發動機同興建設計年產能為500萬馬力嘅生產設施。
最後，有效整合多方面資源能力，熔盛同相關領域嘅龍頭企業結成戰略合作關係，可以充分利用銀行、客戶、供應商等各方面嘅資源，對集團客戶發展同業務增長有正面作用。
回調波動市，「留意IPO，賺錢似做show」，繼續追蹤。
香港大學電子金融服務榮譽助理教授 徐燦傑