內房股恒大地產（03333）上市剛啱一周年，主席許家印去年為爭取令投資者支持上市計劃，與美銀美林、淡馬錫及周大福等投資者訂立協議，恒大喺今年五月至十一月期間，平均股價要維持喺3.5元以上，否則許家印個人就要賠番12億元畀呢班投資者。點知中央頻頻出手打壓樓市，一眾內房股股價表現大上大落，搞到恒大股價無法做到承諾嘅範圍。
所謂願賭服輸，許家印就話，尋日一早已經好準時咁履行協議，將12億元賠番畀啲投資者喇！雖然外面啲人覺得呢個係一項賭博，不過佢就話只係履行合約，依家同啲投資者關係仲係好好㗎！
大拿拿喺荷包拎咗12億元出嚟，都冇影響許家印嘅心情，佢尋日與絲絲不知幾好傾，心情仲勁靚！絲絲膽粗粗問佢有冇肉痛，佢就笑笑口咁話冇，話其實每日嘅心情都係咁好，唔係因為還咗錢所以高興，而係佢個人方面，財政上依然都係咁健康。
余絲韻