絲絲講場：政府搞全球推廣 大陣仗硬銷香港
一直以嚟香港都係福地，背靠祖國下，香港嘅金融發展無論喺上市、資產管理甚至離岸人民幣中心業務上，發展勢頭都唔錯。港府就把握呢個大好形勢，首次與證監會、金管局及投資推廣署合辦一個規模遍及全球嘅大型推廣活動，全方位向外宣傳香港係國家全球金融中心嘅定位，首站將喺下周二到倫敦推廣，明年三月初就會到紐約。
新Logo凸顯「雙優」
為隆重其事，佢哋特登設計咗一個全新標誌，Logo糅合咗中國書法以及由西方文字呈現嘅西方文化，凸顯香港嘅中國薈萃特色，希望將香港係世界上唯一一個同時具備「中國」及「全球」優勢嘅「雙優」地區呢個訊息帶畀外國投資者。
佢哋又好似公司拉客搵生意咁，準備咗一本Pitch Book（專題概覽）向外推廣香港優勢，亦同時出版主題小冊子，深入介紹各個課題。
吓？咁大陣仗會唔會要使好多錢㗎？投資推廣署署長賈沛年預計，首階段開支包括宣傳公關費用大約300萬元左右。絲絲最奇怪係點解今次路演冇港交所（00388）份？財庫局局長陳家強就解釋話，由於今次推廣並非為鼓勵企業來港上市，故港交所未有參與。
余絲韻