絲絲講場：索羅斯港Office開張
國際投資名宿索羅斯喺香港嘅基金公司SFMHK，上星期已經向證監會「攞正牌」，隨時可以大展拳腳，所謂時間即係金錢，既然已有牌，當然拿拿臨「開鑊」，據講SFMHK尋日已正式開張大吉。
兩大得力助手坐鎮
索羅斯嘅兩位得力助手──戴霽昕（Dai Jixin）以及Keith Thomas Anderson將派駐來港坐鎮，成為基金嘅負責人。有人估計，SFMHK可為香港帶嚟約80億至90億美元資金，不過SFMHK只可服侍專業投資者，兼且唔可以持有客戶資產。
管理資產高達250億美元嘅索羅斯基金管理公司，一話喺香港成立辦事處，就備受市場關注，誇張啲講就係聞風喪膽。冇計啦，索羅斯過往戰績彪炳，港人感受最深嘅係九八年佢狙擊港元一役，近期熱錢湧港，索羅斯「煲重」人民幣升值，又話有興趣投資A股等，更令市場及監管機構嚴陣以待。
SFMHK嘅地盤開設喺IFC，亦即係金管局嘅總部所在地，希望索羅斯唔好喺太歲頭上動土啦！
余絲韻