員工係一間公司嘅寶貴資產，好似平保（02318）咁，佢哋對於培訓嘅開支真係一啲都唔手軟，今年足足有成3.3億元（人民幣‧下同），呢條數多過好多上市公司全年嘅盈利，喺真金白銀下，佢哋嘅人均每月首年保費真係高過其他公司好多，不過平安壽險培訓部總經理鄭文珍就話，除咗培訓之外，產能高係建基於成個系統嘅效率。
鄭文珍話佢哋會因應代理人唔同階段去提供訓練，主要目的係希望可以減低代理人嘅流轉率，令佢哋可以做得定啲，每年金額就由業務表現等因素決定。隨住平保嘅壽險業務愈做愈大，佢哋花喺培訓上嘅開支就由○八年嘅1.57億元，增加到去年及今年嘅2.42億元及3.3億元。
平保喺好多主要城市都有自己嘅培訓中心，加埋起緊嘅足足有成97間，佢哋又會不斷設計教材、課程以培訓員工。鄭文珍舉例話，有一堂「表達能力（Presentation）」課堂就差唔多有超過40萬員工都上過，假設日日開班仲未計入訓練導師嗰條數，就要5年至做得完。平保董事長馬明哲平時咁識「Sell」公司，唔知佢有冇上過堂？
對於代理人產能點解可以咁高，鄭文珍就覺得有好多其他系統性原因，好似佢哋要做一單生意，隨時只需要3粒鐘就完成建議書、客戶審閱同埋用POS機刷卡成個程序。嘩！真係快過法國佬食飯！
余絲韻