期指觀瀾：等待機會再建好倉
整個股市都圍繞着美國QE2，牽動亞洲資產泡沫膨脹再膨脹的故事去炒作，昨日恒指三試24,800點支持後，收市前發力再升，以近全日高位收市，升87點報24,964點。收市前一個鐘，現貨錄得330億元成交，佔全日成交三成二，似乎並非純粹挾空倉咁簡單。
十一月期指早市去到24,700點，已擺出一副跌唔落模樣，下午低位也不過24,715點，縱使萬個不願，筆者還是先按計劃把23,760點揸的好倉止賺，短短幾日獲利近千點。毫無疑問，港股超買極為嚴重，留下的上升裂口也愈來愈多，遲早要補回。但資金市，莫估頂，筆者還是建議順勢而行，即使睇淡也不宜試沽。
事實上，本來預期恒指會在24,691點附近，好淡雙方會有一番激鬥，結果上周五輕易突破，昨日即市最低也只去到24,732點已掉頭反彈，淡友無謂拗頸，下一站25,201點，以昨日走勢之強，如無意外周內見到。當然，最理想是恒指最少回補24,550至24,732點的裂口後再升，筆者也會等機會來臨，再揸好倉。
John Mullen