市場熱線：天能動力搵位上車

港股開波跌140點，已算係完成調整，可見幾咁精壯，到3點過後更勇往直前，一個鐘內升約180點，成交1,029億元，今個月係安全期（引人入市階段），25,000點關口已經唔係乜嘢阻力。保險股提早炒加息，除咗平保（02318）之外其餘都好強；電力股仍係最差，但因電煤價格太高，好難追落後（除非加電費）。

祖國禮拜四公布經濟數據，CPI「超4」已經預咗，甚至加息都預埋，依家孖屐好似冇乜壞消息可以令股市行返轉頭，高通脹反而成為炒作藉口，好似內地農產品股尋日普遍上漲約5%。滬綜指再升30點，繼續向住3,200點進發。

銀髮一族最怕貶值

QE2雖然聞者色變，但美匯指數又上番77樓上（即QE2前水平），印銀紙效應可能誇張咗，因為聯儲局平均計每個月只係用1,000億美金左右。不過，驚嚇效果就相當大，有阿公阿婆即刻提取所有「棺材本」買晒大藍籌，呢批銀髮族亦最驚銀紙貶值。

市旺亦掀抽水潮，恒隆地產（00101）抽完之後到信置（00083），傳聞仲有3隻重磅地主股跟尾，新地（00016）○七年32,000點批股最經典。依家只係「開始」未使驚住，但當愈抽愈狼就要小心。

理士（00842）就快上市，兩隻做鉛酸電池嘅同行天能動力（00819）同超威（00951）亦炒起，總之造電池嘅包括飛毛腿（01399）同中聚雷天（00729）均在影子股之列。汽車電池分做鉛酸電池、鎳氫電池同鋰電池3類，一般認為鉛酸電池由於污染環境，所以遲早畀人淘汰，超威七月招股時PE亦得幾倍貨仔。

天能同超威都主力造電動自行車電池，鋰電池太貴同技術未成熟，故鉛酸仍係最盛行，唯一麻煩係鉛價上升蠶食毛利率，已搞到天能上半年成績表倒退，LMF鉛價現處每噸2,500美金屬於高位，天能能否將成本轉嫁到客戶身上要到派成績表至知，但有電動自行車下鄉射住，今年收入有保證。

趁機短炒影子效應

講到PE，超威依然係最低嘅一隻，但新股首年業績靚不能作準，天能反而夠衰，股民唔會有過高期望。天能亦知道長造鉛酸電池會變夕陽工業，所以今年已經努力發展緊其他各類電池，趁理士上市短炒制得過。

戰報

恒盛地產（00845）+10%

古晨尋日建議跟炒恒盛地產，昨日一度升上3.3元，以低位2.98元計，單日升幅逾一成。

鉑陽太陽能（00566）+10%

詩詩上周四建議短炒鉑陽，昨日一度升上0.59元高位，較推介當日低位0.54元升近一成。

古勝