市場熱線：昆侖能源攻守兼備

不過，正如古勝尋日所講，喺呢個不明朗因素消除之後，港股可望海闊天空。好多國家已經閂定閘驚住熱錢搞搞震，而香港除咗冇得加息同冇得升值之外，資金不嬲係「冇掩雞籠」，結果熱錢谷爆香港，本地股樓係「受惠者」。

「債王」預言美元會貶值兩成，又話量化寬鬆係「龐氏騙局」，咁邊個係「受害者」呢？又係香港！煲呔同金管局掌門死攬住聯匯唔放，但個水泡其實係鐵做，只會拖你落水；班官員淨係識叫人量力而為當係「免責聲明」，但前排巴克萊話港紙同人仔掛鈎其實問題唔大，兩年內就可搞掂，但弊在冇人敢「孭飛」。

QE2塵埃落定之後，孖屐會將焦點重新放落花旗嘅就業數據，用印銀紙去救失業率其實效用非常間接。尋日亞洲時段美元未見大散，到黃昏時美指突然插到75.88，歐元升到1.424，澳元報1.01，人仔亦由跌轉升百幾點子。美元一散，買資源股包冇衰，油股同金股係長線選擇。

恒指再升391點，收報24,535點再創新高，成交再增至千二億銀。股票同磚頭有價，地主股係威係勢，尋日亦係「鹹魚翻生」日。

玩落後股要有耐性

東瀛魚缸、大笨象（00005）同祖國移動（00941）都小翻身，玩落後股始終要有啲耐性，好似古勝上個禮拜話車股升完遲早輪到公路股，結果呢排公路股就由最細隻嘅皖通（00995）帶起，隻深圳高速（00548）亦唔錯，揸住深高速水漲船高嘅深圳國際（00152）雖然長期以來不成大器，但亦有破位迹象。

講開落後股，昆侖能源（00135）自從三月開始就喺10蚊關口上落，舊年揸呢隻股賺到笑，今年繼續揸住就笑唔出聲，因為已錯失咗一個大升浪，耐性有冇回報冇人知，但冇升過嘅股跌極有限。就算港股睇牛三，恒指4日升超過1,400點隨時有機會回吐，買昆侖起碼上升空間多過下跌空間，師傅教落：橫行愈耐爆升得愈勁。

燃氣股呢排的確唔係幾爭氣，只係得隻新奧（02688）似樣，不過隻天倫燃氣（01600）認購反應仍然唔錯。昆侖雖然變緊身做燃氣股，但其實仲係大半隻石油股，油價升到85.64美元一桶，佢唔多唔少都受惠，更顯得股價「罰企」冇道理。

變身過程稍嫌緩慢

至於燃氣嗰part，祖國天然氣年中已加價25%，但包括北京在內嘅部分地區住宅用氣仲未開聽證會，燃氣商要「硬食」差價超過5個月，尚幸建議加幅多過每立方米0.23元人仔嘅成本。昆侖上個月用20億人仔投到阿媽個大連液化天然氣項目，雖然變身的確嫌慢，但隨時有機會追落後，屬於低風險、中回報格局。

戰報

高陽科技（00818）+10%

古晨周一指高陽醞釀突破，當日低位3.08元，昨一度升上3.4元，短短四日升幅已逾一成。

暢豐車橋（01039）+13%

帥哥周三指暢豐抵買，昨日在大摩唱好下，創5.34元上市新高，較推介當日低位4.7元升13%。

古勝