尋日有隻新交易所買賣基金——價值黃金ETF（03081）掛牌，絲絲都去咗湊熱鬧，期間突然見到港交所主席（00388）夏佳理帶住一大班老外踩場，絲絲當堂嚇咗一跳，跟住呢班為數差唔多20人嘅團隊行咗幾個圈，一問之下，知道原來佢哋係來自俄羅斯海參崴嘅代表團。
夏佳理話，港府官員喺六月時訪問當地，並邀請咗佢哋來港訪問，所以今次佢哋都有一大班政府官員及商界代表來港，交易所當然亦要好好把握機會介紹吓自己。
相信大家都知，依家已經有俄鋁（00486）在港上市，不過就仲未有俄羅斯註冊嘅企業掛牌，夏佳理話希望有更多俄羅斯企業會考慮來港上市，到時港交所就真係愈嚟愈國際化喇。
余絲韻