人怕出名豬怕肥，有時名人一句半句嘅普通說話，好容易會牽動其他人嘅神經。好似「新興市場之父」麥博士咁，佢喺土耳其上電視嗰陣，就預期當地嘅資產喺年底前會出現15%至20%調整；言論一出之後，個市果然即刻向下插，仲準過神仙，點知就係因為咁，竟然引來監管當局調查佢老人家係咪出蠱惑。
麥博士都係做吓預測畀意見啫，誰知引嚟無妄之災，當地監管機構已經立案調查。照計呢啲預測好平常，監管機構點解突然出手呢？原來係有人打小報告，向監管機構投訴，監管機構冇辦法唔執正嚟做。
呢單嘢搞到咁麻煩，絲絲非常關注，所以都有問吓麥博士點睇，不過佢就透過發言人話不予置評。
據專家講，要證明麥博士出口術非常困難，首先要證明佢做虛假陳述，又要證明佢透過呢個方法去搵錢，然後又要呢樣嗰樣，總之要證明幾千樣嘢。絲絲好希望呢單嘢可以快啲告一段落，否則仲有邊個高人會講意見呀！
余絲韻