厚樸基金成立咗只有3年，估唔到咁快就淡出市場，有啲令人意外。消息人士話，厚樸嘅3位創始合夥人中有兩個會退休，剩低方風雷「撐起頭家」，所以厚樸現有嘅基金只會繼續投資，但唔會募集新資金，相信公司整體淡出亦係不久將來嘅事囉。
厚樸喺行內好出名，創始人個個都來頭唔小，包括曾由投資銀行中金跳槽到高盛嘅明星銀行家方風雷、前高盛銀行家Richard Ong及畢馬威香港前合黟人何潮輝。當中何潮輝早已計劃退休，消息人士話Richard Ong都好大機會「唔撈」喇。
絲絲查番3位始創人嘅資料，發現原來方風雷及何潮輝都未夠60歲，而Richard Ong就更加半百都未到，統統未到退休年齡喎！咁快就話「退休」，唔知係咪想去第二度另起爐灶呢？Richard Ong就親自解畫，話自己呢一刻仲係厚樸嘅CEO。但事實上，Richard Ong嘅兄弟Charles Ong係淡馬錫一位高管嚟嘅，所以有唔少銀行家認為，Richard Ong可能會加入呢個新加坡主權基金。
厚樸最廣為投資者熟悉嘅交易，應該係去年初蘇格蘭皇家銀行減持中行（03988），以及美國銀行減持建行（00939）股份時，厚樸係其中一間「撲」出嚟接盤嘅機構，多得呢啲大機構先至可減輕市場震盪。
余絲韻