絲絲講場：升岡執靚寶麗萊 搵Lady GaGa代言
升岡國際（00485）近期攞咗好多寶麗萊嘅品牌嚟做，呢個品牌已經有好耐歷史，絲絲好想知會點樣將佢搞得「後生啲」，升岡主席劉錫康話已經有橋，可能會搵炙手可熱嘅國際紅星Lady GaGa做新產品代言人。
劉錫康話喺今年三月至四月，升岡攞咗寶麗萊品牌嘅電視、DVD等電子產品特許權，尋日仲成功「衞冕」寶麗萊美加市場嘅數碼影像產品特許權。寶麗萊呢個老品牌喺美國當地市佔率約5%，不過劉主席講到明要幫佢哋改裝，一系列寶麗萊新產品將主打年輕一族。
絲絲都有幫佢諗吓搵邊個模做代言人，劉主席就話唔使擔心，話說寶麗萊主席與國際紅星Lady GaGa相當熟稔，所以大有機會搵佢做新產品代言人，仲要喺明年初拉斯維加斯電子展推出新產品時一齊亮相，最着數嘅係代言人費用全數由寶麗萊負責，升岡淨係夾份畀電子展嗰筆200萬美元費用就搞掂。
劉錫康掟300萬買馬
劉主席計過，未來5年淨係寶麗萊相機產品，已經可為公司帶嚟10億美元銷售額。佢仲話如果睇到6至9個月成績理想，下一步大計就係中國市場。
身兼兩馬之主嘅劉主席近排除咗忙於公司業務，亦忙於買馬，預算斥資200萬至300萬元。劉主席既然志在必得，絲絲亦希望佢為「蝦王」家族再添一員，搵到隻新版「靚蝦王」，再榮登馬王寶座。
余絲韻