市場熱線：保利協鑫重拾升勢

隔晚花旗已當QE2冇到，規模或者細過預期嘅恐慌已提早喺上個禮拜被消化，到今日連不明朗因素都消除埋之後，已經「直路望空」。

市場傾向輪流炒

不過，正如上一段所講，畀你咁易估中就唔會係大戶。照計牛三可以升到你唔信，平均PE去到20倍以上都得，但去到呢個位亦風險相對提高，呢個時候孖屐會輪流炒，尋日主要係炒地主股同碼頭股，如果你夠醒目嘅話，見前日炒航運股，順手買番啲碼頭股就好快有收穫。不過，如果你買着大笨象（00005）同祖國移動（00941），諗住遲早升到佢哋嘅話，呢兩件大隻佬就等到你頸都長埋。

講番尋日個市，朝早開波曾經最少升得13點，10點幾三扒兩撥就篤穿兩萬四，跟住已經踏上不歸路。下晝賣地成交估唔到咁奀，恒指一度升幅收窄，但好快又升到新高，收市升473點報24,144點，係○八年八月以來新高，成交再破千億。賣地結果低過預期好多，證明管制「發水樓」令地主股覺得冇肉食，加埋幾間大錢莊提高HIBOR按揭息率，但地主股成個月以來第一次發威，非同小可。

滬綜指突破3,000點之後連跌兩日，深成指更加跌1.86%，同香港嘅興高采烈差得遠。祖國出年銀根從緊，香港迫住跟美國從寬，同一隻股兩個世界。內房股同係成個月未威過，本地上市嘅內房股尋日稍有起色，但未可言勇。

另外，新能源股雖然係七大戰略新興產業，但近排風電股表現令人失望，中傳動（00658）、龍源（00916）同中國風電（00182）又係同大市升幅脫節，得隻金風（02208）炒新股貨源歸邊效應。不過，同係新能源嘅太陽能股就好得多，因為香港上市嘅多數係做上游行業，尋日中國保綠（00397）認購鉑陽（00566）嘅CB，兩隻「薄膜」結成姻親，雙雙上升慶祝。

多晶硅價續向上

太陽能電池原材料分成薄膜同晶硅兩種，後者龍頭股係保利協鑫（03800），九月開始由1.8元起步，升到十月中嘅2.5元，走勢相當強勁，皆因多晶硅同期價格大升，乜中央唔係話多晶硅產能過剩㗎咩？

據知價格大升嘅原因係外國搶貨，另外前排祖國13個太陽能發電項目招標，結果全部用晒晶硅電池，薄膜1個都分唔到，所以同期硅股勁、薄膜股弱。

保利協鑫抖氣半個月，期內分別同台灣及印度客戶簽咗兩單大合同，而多晶硅價格繼續企穩喺每公斤100美元樓上，業內甚至估出年可再升到120至150美金，由於供應緊張，業界已呼籲中央恢復審批多晶硅擴產項目。經過整固後，隻股有機會重拾升勢。

戰報

儀征化纖（01033）+19%

小尾上周三指儀征可望突破年內高位，昨日果然創3.32元一年新高，以推介當日低位計，累升近19%。

錦恒汽車（00872）+18%

古晨上月二十五日指錦恒具上升潛力，當日低位只有1.9元，昨日收市報2.25元，累積升幅達18%。

古勝