近排絲絲除咗收喜帖收到手軟之外，亦聽到身邊朋友接連報喜嘅消息，去年底拉埋天窗嘅金利豐證券研究部董事黃德几（Dickie）尋日宣布榮升老竇，佢老婆Eva誕下7.5磅重嘅健康BB女。
雖然Dickie冇攞大假陪伴Eva，但都放咗兩日假迎接寶貝女出世，仲走入產房陪產。佢話小B女有好深嘅雙眼皮、亦有好多頭髮，母女平安，大家可以準備好探佢哋㗎喇。記得Dickie喺六月講過，老婆原本嘅預產期係十二月一日，依家BB女早咗一個月出世，星座由人馬座變咗天蠍座。
睇吓佢哋一家三口嘅溫馨照片，Dickie第一次做老竇，摸住囡囡時一臉慈祥，感覺特別溫柔，囡囡咁得意，等我呢個Auntie都預備份禮物畀佢先。
余絲韻