渣打銀行搞嘅馬拉松，已經變咗一年一度嘅國際盛事，佢哋近年贊助嘅「藝趣嘉年華」亦大有潛質發展為吸引遊客嘅活動，早幾日佢哋就喺中環鬧市預演，吸引遊人目光，睇嚟真係可以諗吓將個節目再大搞。
「渣打藝趣嘉年華2010」下周六、日先係正日，喺維多利亞公園中央草坪舉行，嘉年華嘅巡遊預演已全面展開，巨型木偶「海神」大鬧中環，聯同藝趣人員喺午膳時間出沒，更向上班一族及市民大派紀念品，率先將嘉年華嘅歡欣氣氛散播到每一角落！
老友話，呢個嘉年華其實係香港青年藝術協會主辦，渣打負責做贊助。今年以「金、土、水、火、空氣」呢5種不同特性嘅元素為創作藍本，由600位來自100間中小學嘅年輕人以及一眾本地藝術家，共同創作多個8至12呎嘅巨型木偶、小型撐桿偶、誇張服飾、頭飾、絲染旗幟等，並以巡遊匯演嘅方式展示作品；嘉年華亦設有藝術攤位、非洲鼓樂、巴西戰舞等活動及60支年輕隊伍兩日不停嘅勁舞表演。大會今年更特別推出男女老幼皆可參與嘅主題舞蹈「日舞」（Sun Dance），等大家享受歡樂滿載嘅一天。
余絲韻