「股神」巴菲特每年拍賣嘅「與巴菲特午宴」吸引全球目光，尋日出現咗印度版嘅「與巴菲特午宴」，「印度股神」薩克‧金君瓦拉（Rakesh Jhunjhunwala）為做慈善，倣效巴菲特喺eBay網站拍賣食飯時間，經過90次出價，終以140萬盧比（約24萬港元）成交，但與巴菲特今年以263萬美元賣出午宴時間相比就相差好遠。
睇番巴菲特其實仲有好多其他慈善新猷，包括勸富豪無論係生前死後都可以考慮裸捐，又試過慈善拍賣一隻有佢簽名嘅巨型雪糕匙，唔知呢啲善行遲啲有冇人跟風。
至於呢位印度股神，將會與最多9位客人共膳，講明會喺一間五星級酒店共膳3個小時，今次午宴嘅目的係為兒童慈善組織籌款，席上佢會向中標者提出投資建議。呢位印度股神喺股市有唔少戰績，最經典一役係曾經準確咁預測印度股市喺○八年一月份大跌。
佢對股票有興趣係源自爸爸，細個時成日見到老竇同朋友一邊飲酒一邊講股，直到佢25歲時開始買股票，佢嘅其中一名啟蒙老師係有「末日博士」之稱嘅麥嘉華。呢位股神係一位價值投資者，買股票時會睇一間公司嘅盈利模式、成長潛力及生命力，佢認為一家企業最重要係其競爭力、規模及管理品質，故對印度股民有以下忠告：「要理解產生利潤背後原因，唔好用太多精力放喺分析利潤方面。」
余絲韻