市場熱線：中海發展再度啟航

「唧牙膏」推QE2

依家講到QE2規模要起碼5,000億美金至「收貨」，但查實花旗經濟係慢慢復甦，通脹亦回升到1%，用印銀紙去防止通縮只係一個藉口，QE2其實冇必要急急推出，不過，「阿伯」做咗預告，場戲唔做落去就大件事。所以在下斷估QE2會用「唧牙膏」方式，好過一次「晒冷」。

花旗呢招搞到全世界都一齊驚，澳洲同印度尋日率先加息抵抗通脹，澳元尋日卒之升穿1算，帶挈中信泰富（00267）升咗3.5%。祖國就快公布十月CPI，有消息話會升到4%，跟住又會憧憬加息。

恒指同國指分別微升18點同15點，咁悶嘅市成交縮到得762億元，期指轉做輕微高水，收市後外電話美銀唔參與建行（00939）供股，10億美金咁少錢都供唔起？

喺QE2之前，孖屐嘅焦點係九龍塘賣地，或者仲可趕搭「發水尾班車」，雖然本地樓市節節上升創九七後新高，但地主股自從施政報告之後只係表現麻麻，規限發水等於買菜唔准呃秤都幾閉翳。

每日暴升股都有唔少不知名物體，近排就多咗好多奀形礦股跟炒，但話轉型搞礦嘅其士泛亞（00508），股價卻由八月尾開始急插7成，小股東喊得一句句。但「三年唔發市」嘅隆成（01225）就三個月升近1倍，做BB車食正好孩子影子概念。

另外，隻宏華（00196）衰咗咁耐，亦喺谷底強勁反彈，班油商見美金跌、油價升，自然買設備開工，所以幾隻石油設備股都可以留意。不過，尋日最靚仔嘅都係航運股，呢類股好周期性，一係升到甩轆，一係就悶死人。

航運股有力追落後

古勝上個月推介隻中國遠洋（01919）時已提過，傳統上第四季係航運業旺季，雖然呢排波羅的海乾散貨指數維持喺2,600至2,700點咁上下，但航運股尋日大追落後。無他，龍頭股例如中海發展（01138）同中遠第三季成績表均交足功課，兼且中美嘅PMI亦好靚，炒咁耐資源股、車股、零售股都要轉吓口味。

介紹完中遠之後，今日再推介上季賺多64%嘅中海發展。乾散貨主要係運煤、石油、糧食同鐵礦石等，呢排最受歡迎嘅商品係煤，天氣開始凍已令煤嘅需求大升，近期市場運煤費已高過中海嘅合同價50%，以呢個趨勢中海出年嘅運費可大幅加價。

另外，中海嘅散貨船隊嘅載重噸將由舊年底嘅380萬，到一二年會升到1,000萬；商品價升除咗炒資源股之外，航運股亦會受惠。

戰報

國際精密（00929）+33%

古晨上周三介紹國際精密，昨日股價創一年新高，高見1.44元，較推介日低位升33.3%。

裕田中國（00313）+30%

帥哥喺上周一建議買入裕田中國，昨公布購買物業開發投資業務，高見0.31元，最多升30%。

古勝