呢期股市繼續熾熱，股票各自飛行，IPO繼續喺香港各自出擊，剛剛見到隻新股都可以留意吓，就係泓淋科技（01087）。泓淋喺全球數據傳輸線纜相關行業中佔據領先地位，喺全球多個細分行業領域已經佔據咗前五名嘅市場地位。
據獨立市場研究及諮詢公司調查，喺目標消費電子市場中，按一○年上半年收入計，泓淋喺市場係：全球第二大外接訊號線組件製造商，市場份額21.8%；全球手提電腦內接訊號線產品製造商同全球數據傳輸線纜製造商中位列第三位，市場份額分別係19%同7.3%。
泓淋有龐大同穩固嘅客戶基礎，佢哋同好多國際一流嘅電子企業維持穩固而且長期合作關係，而且獲選為多款產品核心供應商，如三星、LG、海爾、海信同中興通訊等。
佢哋亦都建立垂直整合業務模式，從塑膠、抽銅、數據線纜、精密模具、沖壓及注塑到連接器、訊號線組件、電源線組件同天線組件等，係同業裏面少數可以提供完整配套產業鏈，令到佢哋喺研發同生產活動中保持良好嘅合縱連橫，有效提高產品質量同控制營運成本。
另外，泓淋有完善嘅產業布局同營銷網絡，根據客戶嘅所在地，泓淋分別喺威海、蘇州、德州、武漢同台灣進行產業布局，建立營銷網絡，亦都計劃喺重慶同惠州設立新廠區。鄰近客戶嘅優勢令到佢可以方便及時回應客戶嘅要求而且提供更好嘅服務，同客戶建立更深入嘅策略合作關係。此外，泓淋喺台灣建立起國際營銷中心，開拓歐美日市場。全球化概念興起，幕後功臣走向大舞台。都係嗰句，繼續追蹤，永無放鬆！
香港大學電子金融服務榮譽助理教授 徐燦傑