近期喺街頭巷尾都聽到好多人講新股，尋日有隻新股熔盛重工（01101）開投資者推介會，亦因為太多投資者出席，搞到連三文治都唔夠供應，最後仲要一班靚女公關出動去買三文治返嚟畀班「芬佬」醫肚添！
話說熔盛尋日嘅推介會相當墟冚，甚至連「彤叔」鄭裕彤嘅乖孫鄭志剛（Adrian）喺同一層樓食完飯，見到咁多人都要眼望望睇吓發生乜事。由於真係太多基金經理及分析員出席，絲絲後來竟然見到一班靚女公關好匆忙咁拎住一袋二袋三文治趕入會場，你都咪話唔辛苦！
老友話畀絲絲知，通常呢類推介會會根據發出嘅邀請擬定開幾多圍枱，除咗正常座位之外，仲會有一批俗稱「三文治位」嘅後備位，而供應嘅食物就當然係以三文治為主。至於尋日酒店突然提供唔到咁多三文治嘅情況，其實只係個別例子啫。
余絲韻