絲絲講場：張化橋出書「想出名畀人讚」
一向作風敢言、有「民企之父」之稱嘅瑞銀董事總經理張化橋尋日喺個人新書發布會上，笑言出書原因係「因為我想出名，雖然今年47歲，但都同小朋友一樣，鍾意畀人讚，所以每次寫文章正如交作業，每寫完一篇文章都會拎畀朋友評論，然後先放上Blog」。
張化橋創作靈感大多來自與客戶和朋友見面時傾開嘅話題，以及搭飛機時爭取時間睇金融書，久而久之睇咗大量書本，累積好多投資心得，喺朋友建議下就首度推出著作《投行分析師的叛逆宣言》。
收益捐湖北母校
佢透露呢本書有大陸及香港兩個版本，前後用咗一年多時間寫作，每篇都非常認真咁寫，香港版首三篇更專門獻畀本港讀者。佢希望呢本書喺中港市場分別可賺到20萬元及30萬元嘅利潤，合共50萬元嘅收益會捐畀母校湖北省荊門縣馬良中學，為學生建設操場。
余絲韻