絲絲講場：許照中寫作工具唔貪新
近期最Hit嘅電子產品非iPad莫屬，好多人都揸番一部，證明自己係「潮人」。僑豐證券董事總經理許照中喺中環出出入入，當然有齊iPad、iPhone等潮物，雖然呢啲人氣產品大熱，但許照中仍鍾情用陪伴自己多年嘅手機寫嘢，證明佢係一個唔會貪新忘舊嘅人！
經紀佣愈滴愈少
大家都知許照中喜歡寫文章，以前曾出過書，做過作家，亦定時為報章寫稿。絲絲心諗佢實會利用依家嘅新科技，點知佢話堅持用番已用咗多年嘅手機寫嘢，仲話冇咗佢唔掂，真係非常長情。
講番證券行業嘅發展，經紀行爭相減佣已係不爭嘅事實，原來行內有句術語，將經紀佣嘅百分比叫做「滴」，舉個例，以前嘅最低佣金0.25%，就叫做「25滴」，依家有啲經紀行減到「6滴」（即係0.06%），如果個客買賣多兼做得大，更加係減到「1、2滴」。嘩！咁咪愈滴愈少？難怪許照中要為僑豐不斷諗計發圍，兼且度橋提升形象啦！
余絲韻