好多人都擔心內地經濟起飛加上配套發展得愈來愈完善，會影響香港作為亞洲物流中心嘅地位，不過事實原來又未必係咁！最新嘅統計就顯示，香港機場已連續7個月跑贏美國田納西州嘅曼菲斯（Memphis）機場，成為全球處理量第一嘅貨運機場，靠嘅就係iPhone、LV袋同埋龍蝦！
據《彭博》嘅統計顯示，今年首9個月香港機場處理嘅空運貨物達303萬公噸，多過曼菲斯機場嘅291萬公噸。曼菲斯喺過往18年一直穩坐冠軍寶座，香港今年連續7個月跑贏佢，就係靠iPhone、iPad大行其道，內地廠家有份生產呢啲高價電子消費品所帶動，加上內地經濟咁好，大把人捨得買LV手袋等奢侈品以至龍蝦等高價食材，真係嚟幾多就掃幾多，推動香港機場貨運量登上世界第一。
貨運咁勁就益埋國泰航空（00293），令佢哋超越大韓航空成為全球最大嘅貨運航空公司。另一個意義就係拉近兩大快遞公司嘅競爭，事關聯邦快遞（FedEx）以曼菲斯為主要樞紐，而香港就係DHL喺亞太區嘅主要樞紐，步步進逼嘅訊號好明顯喇，唔知佢哋會點鬥法呢！
余絲韻