絲絲講場：港交所年報贏大獎
一年一度由香港管理專業協會主辦嘅最佳年報獎已經塵埃落定，喺九十九份參賽年報中，港交所（00388）脫穎而出攞到大獎，評審一致認為內容全面、覆蓋詳盡以及表達形式專業，係佢哋取勝嘅原因。至於喺「工商企業」類別中，金獎就由中電（00002）贏得，恒生（00011）及港鐵（00066）同獲銀獎；「非牟利及慈善機構」類別金獎就由證券及期貨事務監察委員會奪得。
喺頒獎禮上，絲絲見到身兼香港專業管理協會副主席嘅中華煤氣（00003）常務董事陳永堅，佢對於公司攞唔到獎冇感到失望，仲話只係志在參與，又話覺得每間公司對外公布資料有唔同嘅策略，喺表達及資料分析上，可趁機會向其他公司學習吓喎！
咁難得見到陳生，當然乘機問吓「四叔」抱孫嘅事喇，佢話自己呢排成日要去內地做嘢，少咗機會見到四叔，但睇報道都覺得四叔應該好開心。
余絲韻