港燈（00006）以往淨係做港島區嘅電力供應，不過依家不斷向外闖，仲話要改名以反映業務方向嘅轉變。百年老店「港燈」咪從此消失？放心喇，呢個已有120年歷史嘅集體回憶唔會冇咗，佢哋只係會改上市公司個名，負責香港供電嘅「香港電燈有限公司」仍維持「港燈」品牌營運，日後嘅電費帳單應該唔使換Logo。
將來「6號仔」嘅新名稱究竟會唔會保住個「燈」字，抑或全用英文簡稱嚟代表佢哋邁向國際化？港燈主席霍建寧就冇畀貼士，話唔埋搞個徵求意見比賽都好喎。
有咁大嘅轉變，全因港燈、長建（01038）及李嘉誠基金會以718億元收購EDF旗下英國電網資產嘅交易已完成。交易搞掂後，未來一至兩年內港燈海外業務佔集團盈利嘅比例，就會由目前嘅三分之一大增至接近甚至超過一半。
據港燈集團董事總經理曹棨森解釋，考慮改名係要適當反映集團未來嘅發展策略重點。
搞到上市公司要改名咁大件事，大家可能會問EDF英國電網生意有幾大？據長建董事總經理甘慶林話，○九年EDF英國電網嘅盈利有5億英鎊，若以長建及港燈分別持有四成股權比例嚟計，涉及金額各自高達2億英鎊（約24億港元）。以長建去年來自英國業務盈利有6億元計算，EDF英國電網嘅盈利隨時可達其原有英國業務嘅幾倍，怪唔得港燈今次要連名都改埋，以反映業務發展嘅轉變。
余絲韻