市場熱線：五礦資源收購壯大

恒指呢4日只係玩咗一轉360度過山車，依然係未過23,800點嘅阻力位，今晚花旗中期選舉應該唔會影響大局，民主黨喺眾議院敗局已定，全世界睇住議息，但港股拿拿臨率先完成調整，睇嚟「開大」嘅機會多過開細。

原材料升工業股愁

港股主板成交910億元，雖然美匯仍喺77邊掙扎，但資源股又再旺場，尤其係煤股稍回之後勁勢未減，個「千年一凍」未到戲肉已經炒㷫啲煤股。祖國樣樣有得炒，糖價已升到每噸7,300人仔新高，中央要動用儲備糖去壓價，不過隻西王糖業（02088）未見跟住升，因為佢之前公布第三季毛利率不升反跌，皆因佢嘅玉米成本升得仲快。相同道理，資源價格升得咁快，對工業股嚟講係危多過機，所以呢排落後大市。

巨騰（03336）同瀚宇博德（00667）兩隻往績唔錯嘅台資電腦相關工業股尋日齊齊香，可見低毛利工業股受原材料價格上升影響有幾大。

零售股炒極都仲有，尋日借住公布九月零售數據，I.T（00999）又升一成。不過，祖國嘅奶股就冇乜力，尋日上市嘅雅士利（01230）破底12.4%，上禮拜上嘅環乳（01007）亦係潛水，舊年上市嘅澳優（01717）一樣唔掂，三聚氰胺嘅陰影兩年都未散。

孖屐炒到二線金屬股，洛鉬（03993）同湖南有色（02626）上禮拜五勁升之後，尋日仲有餘勢，而且炒埋隻中鎳（02889）。鉬業有機會列入保護性開採礦種，銀紙可以無限量印製，礦產係有限因而相對值錢。五礦資源（01208）個阿媽五礦集團係祖國最大礦商，淨係想像空間都非其他礦產股可比，早個幾禮拜啱啱獲注入144億元嘅資產，跌完又再升過，間公司講到明想做「伸手黨」，但伸手嘅目的係收購資產壯大公司，唔同無端端為抽水而抽水。

變身多元金屬公司

五礦資源係一間做氧化鋁嘅公司，鋁業嘅環境喺各類金屬股之中算係比較差，淨係睇中鋁（02600）股價同成績表就知道。

不過，五礦未來唔同咁睇法，佢依家市值125億銀，將注入嘅資產高過佢本身市值，四個新礦山包括金、銅、鉛、銀、鋅等，即係變身做一間國際多元化金屬公司，而收購後將令五礦預測PE大降至單位數字，如果量化寬鬆搞到金屬價格繼續升，呢次收購更加覺得抵。

戰報

中國天化工（00362）+15%

高仁喺上周四推介嘅中國天化工，憧憬化工產品可加價，昨高見0.285元，累積升逾15%。

恒芯中國（08046）+31%

詩詩喺十月廿二日指恒芯中國業績理想，昨日升至五個月高位，最高見過1.03元，累升逾31%。

古勝