一隻友邦已超3倍
正如尋日星交所全日總成交額只有21.64億坡元（約128.5億港元），港交所單係一隻友邦保險（01299）已有493.9億港元成交，即係話，本港一隻股票嘅成交額已經係星交所整個市場成交近3倍！
大家或者會話，可能星交所尋日成交偏低，而香港又偏偏有隻「巨無霸」新股上市，先至形成咁懸殊嘅對比，咁樣比較未必最公平。但睇番星交所整個九月份平均每日成交額亦只係18.1億新加坡元（約107億港元），而港交所每日最活躍20隻成交股份，頭嗰幾位每隻閒閒哋都有二、三十億元成交。
絲絲心諗，睇嚟星交所與香港市場嘅距離愈來愈遠，因此就要諗盡方法自救，但合併係咪一條出路，就真係考起嘞！
余絲韻