絲絲講場：張化橋出書猛人撐場
有「民企之父」之稱嘅張化橋，其首本著作《投行分析師的叛逆宣言》終於面世啦，下周一仲會搞個新書發布會，當日會有唔少「明星級」嘉賓到場支持，好似「星級分析員」陸東、恒生總經理馮孝忠等。咁多財金界猛人，絲絲一定去捧場兼拎親筆簽名。
「民企之父」處男作
眾所周知，張化橋因為踢爆歐亞農業黑幕以及創立民企指數，加上敢言作風，故獲得「民企之父」稱號；佢領導嘅研究團隊更被著名雜誌《機構投資者》連續5年選為「最佳中國研究團隊」，實力強橫。張化橋曾中途出走，離開瑞銀加盟深控（00604）做高管，○八年又重返瑞銀做董事總經理兼中國投資銀行部副主管。
今次呢本新書係張化橋加入財金界17年以嚟嘅第一本著作，內容十分豐富，除咗會詳述投行分析員嘅盲點之外，仲會講吓黃金投資法則及優質選股法則，絲絲覺得唔睇就真係走寶喇。另外，張化橋仲會將呢本書嘅所有稿費，捐番畀母校湖北省荊門縣馬良中學，名副其實善心爆棚。
余絲韻