分析及預測上市公司股價可以有好多方法，有啲分析員為咗出位，會用好多奇怪嘅方法做分析。好似《財富》雜誌就將蘋果公司喬布斯搭私人飛機出差嘅津貼，嚟分析蘋果公司股價，準唔準？大家就要自己用腦分析吓喇。
《財富》話喬布斯喺今年首季周圍飛，例如曾經飛去美國東岸向當地媒體推銷蘋果公司嘅平板電腦iPad，佢其後就向公司拎咗12.7萬美元嘅私人飛機津貼，咁啱蘋果公司股價喺第二季有好大升幅。
喬布斯喺六月二十七日至九月二十五日就拎咗9.3萬美元嘅私人飛機津貼，莫非係意味着蘋果公司股價喺第四季會有可觀升幅？若然應驗，就代表佢喺某一季領取嘅私人飛機津貼愈多，公司股價喺之後嗰季就會升得愈勁喇！
摩根士丹利分析員胡貝蒂喺○八年二月已提出過呢個論調，仲建議投資者跟住呢個理論去買蘋果公司股票，但發現好似唔係好啱，例如喬布斯喺○八年首季拎咗多達55萬美元嘅私人飛機津貼，但喺嗰季之後，蘋果公司股價都唔算特別標青，所以呢個理論大家都係參考吓好啦，唔好信到十足十。
余絲韻