絲絲講場：友邦送祝福盼頂爺康復
友邦保險（AIA）（01299）排除萬難，尋日終於登陸香港嘅金魚缸，大家都知友邦上市其中一個目的係幫「阿媽」美國國際集團（AIG）還債，但並無影響母子關係。
點解咁講？皆因尋日上市儀式即將結束時，交易大堂嘅投射銀幕顯示「Bob,get well soon」嘅字句，Bob係邊個？就係AIG主席本穆沙（Bob Benmosche），佢喺本周一突宣布患癌，依家正接受「密集式」化療。雖然AIG要「賣仔」償還美國政府嘅貸款，但「阿仔」仍送上真誠祝福，正正係切肉不離皮嘅真實版。
夏佳理晨早恭候
講番友邦尋日掛牌，好多大人物都嚟贈興。港交所（00388）主席夏佳理（Ron）當然有出席上市儀式，阿Ron未夠9時已現身交易所，可見佢幾咁重視。友邦都好有心思，除咗一隻金色水晶牛外，仲準備咗一幅印有友邦總部今昔外觀嘅畫，送畀港交所作紀念。
友邦執行主席杜嘉成朝四萬咁口，佢話好滿意今次上市嘅定價，尋日絕對係友邦發展嘅重要里程碑，嚟緊佢哋會繼續發展喺15個國家嘅業務，其中當然唔少得中國市場。
余絲韻