呢排股市當旺，新股輪流上市，大家會計吓邊隻賺最多，每手賺幾千蚊就騎騎笑，但睇吓尋日台灣有隻叫宸鴻嘅新股掛牌，投資者帳面賺成28.5萬元新台幣（約71,250港元），就發現我哋只係賺得雞碎咁多。
真係好耐都冇見過台灣啲散戶瘋狂追捧一隻新股，宸鴻每股定價220元新台幣，但市場就睇好佢首日掛牌會升至逾500元新台幣，即係幾乎抽中就有獎，所以吸引到45萬戶認購，創下超購245倍嘅驚人紀錄！中籤率僅1.3%，亦創下台灣承銷新制以來最低中籤紀錄。有散戶開心到爆，話幾乎賺咗一年嘅人工，以尋日嘅轉手率計，相信絕大部分散戶已「Good」咗水。
宸鴻尋日收市報505元新台幣，以每手1,000股計，投資者首日帳面即賺28.5萬元台幣，真係好和味。宸鴻甫上市即進身台灣高價股第3位，聲勢凌厲，呢間公司點解咁巴閉，吸引咁多散戶追捧？身為蘋果公司主要觸控面板供應商嘅宸鴻，佢哋嘅產品係iPhone內最貴嘅零件，全球半數iPhone、iPad嘅觸控螢幕係佢哋造嘅。宸鴻亦係電容式觸控龍頭，市佔率達50%。
宸鴻董事長江朝瑞好謙虛咁話：「冇iPhone就冇宸鴻。」為免上市後畀人用放大鏡咁睇，佢哋將奉行「唔評論客戶、唔評論對手、唔評論往來廠商、唔評論股價」嘅原則，實行繼續低調。
余絲韻