呢排個市似乎係「擋不住的風情」，話回又回唔盡，繼續炒股，認真厲害，依家全世界都預咗奧巴馬會再救市，所以乜嘢藉口同唔好嘅消息都可以用「印銀紙」搞掂佢，真係可以升到你唔信。筆者有一位相知多年嘅股評人喺21,000點開始叫人走貨同埋沽期指，結果係點？梗係畀人透過Email、Fax鬧到佢飛起啦！
筆者不斷提倡「中港金鐘罩」，似乎又成為一個唔錯嘅模式，連阿爺市場都開車，由「熊三走向牛一」，咪話唔犀利（喺之前嘅文章已經提過，冇吹水），繼續向高處走，唔使講。
喺呢個高位，買唔買股票，其實好睇你嘅忍功，成日都話資產泡沫，實情係資產價格開始脫離真實價格。不過，大家又願意「摸高」繼續高買高賣，都係嗰一句，睇位千祈唔好太盡。
依家係泡沫市，千祈唔好「輕言做淡」，我哋其實係股市中嘅微塵，要乘風破浪，都係跟住班「大戶」行，千祈唔好當自己係股神。等市回番再嚟過，唔好畀23,000點嚇一嚇就驚咗，風險唔可以承受太多嘅就買安碩A50中國（02823），不過記住買ETF唔可以太心急，耐性行先。
另外，新股四環（00460）同友邦保險（01299）都可以追蹤，有古仔講嘅股票都特別好講，每隻股票其實好似係一個靚女，用「睇女、追女」嘅心態揀股票，都係我多年追股嘅做法。用我嘅新股投資法，MONGOL MINING（00975），有符合我系統嘅指標（都係請大家睇番我以前啲文），都係嗰句，繼續追蹤。
香港大學電子金融服務榮譽助理教授 徐燦傑
（作者為註冊持牌人士）