好多阿媽都同仔女講，話兄弟姐妹唔可以爭嘢玩，估唔到用喺管理央企方面一樣有用。話說尋日有內地媒體引述國資委消息話，嚴禁央企喺海外收購時有惡性競爭，因怕好多央企喺收購時互相搶高收購價。咁又係嘅，仔女爭嘢玩，最後受罪咪又係要善後嘅阿媽！
話說依家中國「水浸」，加上人民幣係咁升值，搞到近年好多央企都好積極出國收購海外資產，尤其係資源方面，好似神華（01088）及兗煤（01171）都有買澳洲煤礦，中石化（00386）最近亦出手收購咗個巴西油田。
不過有時會發生幾間央企搶購同一件資產，好似早年蒙古嘅全球最大煤礦Tavan Tolgoi曾經公開招標，搞到神華及中鐵（00390）一齊爭標，競爭冇問題，但有時變成惡性競爭就會搶貴晒個收購價，搞到國資委都睇唔過眼，要禁止呢種惡性競爭，要求以後只要有一間央企出手，其他央企就唔可以插手。
其實喺今年三月，國家能源局同發改委已經要求國有石油公司喺收購海外油氣資產時要有商有量。所以話，今時今日唔單只教仔女難，教央企一樣甚為艱難。
余絲韻