以「股神」巴菲特今時今日嘅地位，一舉手一投足都會引起市場猜測，就好似早前佢講過一句說話，指中國擁有非常龐大嘅經濟實力，相信進一步增長空間好大，大家就估佢可能會喺中國搵大型投資機會，就好似畀佢金手一點嘅比亞迪（01211）。
有分析根據巴菲特一貫嘅投資策略，搵咗「股神」有機會投資嘅5家喺美國上市嘅中國公司，包括中移（00941）、大連綠諾、生物科技公司Techne、玉柴國際及西安寶潤。其中市值達二千幾億美元嘅中移，上榜原因係股價喺過去10年間，每年都有增長，同時淨資產收益率平均上漲咗約24%，完全符合「股神」嘅投資條件。
另外，Techne及玉柴集團嘅平均收益率同樣差唔多有20%，大連綠諾嘅收益率亦係有升冇跌，至於西安寶潤雖然市值細，但發展潛力好大。市場話平均收益率增長、負債低以及增長潛力大嘅股票都係巴菲特所愛，咁我哋就一於拭目以待睇吓佢點揀，但結果唔係咁易估到，或會出乎意料，否則個個都做到「股神」啦！
余絲韻