好多人都話愛靚係女人嘅天性，不過其實男人都一樣愛靚㗎，好似蒙古礦業（01166）主席周禮謙咁，佢尋日就因為塊面生咗粒暗瘡而唔肯畀記者影相！
近期稀土礦成為熱門話題，蒙古礦業喺上周公布正洽購緊稀土礦後，股價一度爆升成倍，呢單料咁爆，絲絲自然要趁佢哋尋日開股東會去了解清楚啦。
但當有攝記想循例幫周禮謙影番張靚仔相時，周生就表現得有啲扭擰，話自己塊面生咗粒暗瘡，所以唔好影嘞。不過據絲絲觀察所得，周生鼻旁的確好似生咗粒暗瘡，但似乎就唔多起眼，如果因為咁樣而唔肯影相，咁佢嘅愛靚程度真係比得上女士喎。
雖然周生話唔影相，但都好Nice咁同記者傾咗幾句，不過因為公司就嚟公布業績以及聯交所規矩所限，加上公司秘書陳錦儀小姐期間又不停提醒呢樣唔講得，嗰樣又唔講得，除咗話一名董事正幫公司洽購稀土礦外，所有有關個礦嘅嘢一律唔答，就連個礦喺邊度都一樣唔講得喎。
余絲韻