絲絲講場：黑石舵手講Talk名人捧場
黑石集團主席施瓦茨曼（Stephen Schwarzman）尋日來去匆匆，日間專程乘搭私人飛機來港出席港大陸佑堂嘅金融座談會後，就即刻飛往上海開會，呢個短敍時刻吸引到好多名人嘉賓到場，包括黑石大中華區主席梁錦松、中策（00235）主席馬時亨及亞視前主席張永霖等。活動完結後，施瓦茨曼就飛奔上車，梁錦松全程喺隔籬護航，對於記者一連串嘅提問，施瓦茨曼只拋低一句「No comment（冇意見）」。
馬時亨打頭陣發問
喺活動期間，第一個發問嘅係台下嘅馬時亨，佢問：「自雷曼倒閉以來，美國新嘅金融改革會有效嗎？」施瓦茨曼回應話《巴塞爾協定三》只係金融服務業改革嘅新開始，新改革可以解決市場過度借貸問題，有效控制股票市場嘅投資風險。
台下觀眾聽得最津津樂道嘅，係施瓦茨曼分享佢自己嘅經歷，佢話外人睇佢哋好風光，但其實背後過程係好艱辛，佢初入行時其實好悶，好濕碎嘅嘢都要做，但捱過咗呢個時期，並得到上司嘅賞識後，獲分配嘅工作就會變得有趣。
余絲韻