市場熱線：重慶機電再闖高峰

美金繼續話晒事，尋日美匯指數突然回升到最高77.64，喺「哈囉喂」前夕嚇你一嚇，但古勝寫呢篇稿時已回軟到77.28；記得上個禮拜美匯指數亦曾經作勢反彈，但結果只係好似放煙花咁短癮。

至於今次係「浪來了」抑或「狼來了」（學鄭家華話齋），讀者今日會較為清楚，如果美匯再惡唔出樣，好友就更加肆無忌憚。

尋日提過思捷（00330）係最後一隻未升藍籌，卒之尋日做咗藍籌升幅榜冠軍，但升幅只係1.69%。美金升就資源股弱，祖國魚缸「7連升」斷纜，滬綜指尋日兩破3,000點關口，但都係守唔住，收市倒跌16點，成交創4,886億人仔天價。在下喺約兩個禮拜前講過，據統計祖國開大會前多數升，開完會多數跌，冇咁準啩？

買內需股實冇衰

五中全會尋日閉幕，原本環保節能同消費兩個板塊最受惠，點知美國佬突然話中國補貼綠色能源，搞到環保概念股當堂打窒，但內需股亦見獲利回吐，「十二五」概念股得兩隻基建股——中鐵（00390）同中鐵建（01186）食水尾，古勝認為都係內需股「有買貴、冇買錯」，未來幾年依然係主題所在。

施政報告嘅效應話咁快就過，周末二手樓買家返晒嚟，美聯（01200）同田生（08136）亦生猛番，曾俊華話「樓市慢慢跌最好」，可列為廢噏之最。樓市係魔獸，你估養隻狗咁聽話？祖國樓市㩒咗咁多次都㩒唔跌，不過中央「十二五」規劃已放棄「保八」，「鬥地主」可能會升呢。

有一樣肯定嘅係，中西部未來發展形勢大好，《福布斯》前幾日選咗未來10年發展最快嘅19個城市，成都同重慶均榜上有名。尋日逆市上升嘅股份，重慶機電（02722）係其一，本月初重機股價升到最高2.66元之後回落，最低見2.36元，尋日收報2.59元，睇個勢有力再創新高。

能受惠重慶概念

間公司有四大業務，其中商用車輛零部件嘅表現最好，亦係意料中事，估計下半年仍然可以撐起成間公司嘅增長。管理層話想開拓新能源同國策扶持業務，而四大業務亦有購併重組嘅機會，所謂「近水樓台先得月」，重慶如果發達，重機嘅各項業務都會有唔同程度嘅得益。

重機嘅預測PE約15倍，以工業股來講不算平亦不算貴，但加埋重慶嘅發展概念就有得諗，尤其如果破咗上次高位之後，若再升一成可見2.92元。

戰報

重慶鋼鐵（01053）+14%

帥哥十月七日指重鋼有勢重拾上升軌，昨日高見2.52元，較推介當日低位2.2元，升14.54%。

光大控股（00165）+16%

股博士上周二認為光控短期博得過，股價昨高見22.4元，較上周二低位19.22元累升16.54%。

古勝