呢期大家都講一一年經濟前瞻，亞太區股市名家──陶冬都話金股樓升唔停，似乎又為股市加咗一把勁同落埋鑊炒多轉，喺低息嘅環境之下，錢都要搵出路㗎，股、樓、資源、金就梗係升到唔停啦，仲使講！
當全世界估日本加息，佢即刻用「逆向方式」減息，其實呢個現象好簡單，世界已經係平嘅，大家依家互相牽連同制衡，冇一個國家夠膽帶頭加息（除咗美國，但奧巴馬又要準備再印銀紙嚟頂住經濟），可能喺無可奈何之下，資產泡沫會變成一個「細水長流」嘅漫長問題，但大家只好「掩耳盜鈴」，過得一期得一期，冇計。
如果大家唔善忘，都應該記得古巨基有一隻經典金曲叫做《愛得太遲》，其中一句歌詞係咁講「最心痛是，愛得太遲」，呢句歌詞正好反映恒指由九月低位20,400點左右，約一個月就爆上差唔多23,000點，無貨喺手，都咪話唔心痛。不過，大家唔好心急，只要佢企穩喺22,700點，都仲未係太遲，繼續留意同追蹤，只望唔做就更加傷悲。
由筆者喺本欄寫稿講港交所（00388），已經有一段日子，正如之前所講，港交所的確係「升勢早有因」，AMS3.8、小型QFII、人民幣計價產品，全部都係一步一步咁計算在內，加埋筆者成日講嘅「中港金鐘罩」（即中港股市同步），形態上完全配合，所以港交所由九月120元升上160元，係意料中之事，股評人黃德几話港交所升勢未盡，梗係有道理啦！如果回吐，150元係一個好嘅支持買入，目標價我唔講，「牛三起，港交所勁」，自己估吓啦！
香港大學電子金融服務榮譽助理教授 徐燦傑