絲絲講場：蕭莉玲信命唔炒股
唔好以為做金融界嘅人，會因為近水樓台而成日喺股市樓市出出入入，美國萬通亞洲首席市務總監蕭莉玲（Jeanne）就話自己缺乏安全感，兼且幫自己測過字，唔會有偏財，所以唔啱炒股票。
測過字話冇偏財
Jeanne投資咁保守，唔單只因為測過字話冇偏財，仲同過往經歷有關。原來佢細個時，爸爸已經炒股票，試過炒仙股輸咗好多錢，影響咗佢嘅睇法。物業投資方面，佢就鍾意租樓多過買樓，仲話以相同面積計，租樓平過供樓好多，不過第時退休都一定會再買番樓，因為到時投資風格冇咁積極，最重要都係要有瓦遮頭。
Jeanne笑笑口話自己缺乏安全感，需要有錢傍身，所以好佩服嗰啲廿幾歲就結婚生仔嘅人，話佢哋好犀利，因為養小朋友好貴！不過佢都唔使擔心啦，因為佢已經有份買咗超過20年嘅保單，依家每年回報仲超過5厘添。
講起公司嘅發展，佢話今年已請多咗400幾名財務策劃顧問，總數已增加到約2,100人，絲絲以為口才精叻嘅梗係當中最Sell得，點知Jeanne話生意做得最好嘅，往往係啲樣貌及談吐忠厚老實嘅保險從業員喎。
余絲韻