絲絲講場：美麗華引入豬扒名店
美麗華（00071）係恒基系嘅其中一項重點發展業務，李兆基幼子李家誠主力「搞活」美麗華，成績都唔錯，令人好有「Fusion」嘅感覺。尋日又有新搞作，就係與日本Green House Foods餐飲集團合作，將日式炸豬扒品牌Saboten（勝博殿）引入香港及內地市場，計劃合共開設120家店，總投資額約2億元，各佔一半股權。
兩年內開20間店
李家誠接手美麗華後，最大改動係將「美麗華酒店」呢個中文名掉咗，改名「The Mira Hong Kong」，佢尋日冇出嚟，引入豬排品牌呢個重任就交畀總經理陳偉成。陳偉成話集團計劃兩年內在港開設20間勝博殿，初步會揀銅鑼灣等旺區開店，第一間店希望喺4個月內開業；內地嘅目標係5年內開設100間店，正喺上海及北京物色選址。至於四叔好鍾意用嚟請客嘅國金軒，都會喺明年三月進駐北京，以連鎖店方式進軍內地市場。美麗華財務總監劉健成話，集團現時餐飲業務佔收益約20%，期望未來可提升至50%，並於兩年內將旗下餐廳數目翻一番。
佢哋報喜話「十‧一」黃金周酒店業務表現好好，入住率同比增加20%，達85%，房間租金亦較去年同期增加20%，平均達每晚1,700元。
余絲韻