絲絲講場：滙豐豬仔錢罌設計比併
相信好多人細個嗰陣，都曾經擁有一個豬仔錢罌用嚟儲起啲零用錢，為咗鼓勵新一代嘅小朋友儲蓄，滙豐推出一個名為「小錢罌大夢想」嘅理財教育項目，當中包括豬仔錢罌設計比賽，畀全港小學生發揮創意，幫隻白雪雪嘅豬仔錢罌設計唔同造型。
「柴九」教囝囝儲錢
據聞滙豐今次準備咗七千隻豬仔錢罌畀參賽者設計，錢罌本身材料以及顏色筆都係採用環保物料。喺尋日嘅活動上，絲絲見到滙豐銀行香港區個人理財業務主管麥倩華手上拎住隻公主造型嘅小豬錢罌做示範，真係好鬼趣致。
另外，嘉賓黎耀祥就帶咗佢囝囝親手設計嘅豬仔錢罌，上面畫咗架飛機，原來因為佢囝囝夢想係做飛機師，所以「柴九」就鼓勵佢畀心機儲錢。黎耀祥話佢培養兒子從小就儲錢，佢自己亦甚少花錢，大部分收入都撥作儲蓄，佢話自己份人比較安分守己，冇乜特別大夢想，最大願望係買間大啲嘅屋，等屋企人住得舒服啲，始終投資物業係最穩陣，又可以放租，可惜依家樓價太貴。
余絲韻