打工仔日做夜做咁辛苦，除咗為兩餐之外，當然最想得到上司嘅嘉許，尋日每一位ING保險嘅員工就過咗個「Happy Monday」，事關公司高層非常貼心，眼見今年生意增長強勁，尋日送畀全體近400名員工一個「Big Suprise」——每人一部iPod Touch，以示鼓勵。
負責送上驚喜嘅係ING香港及澳門地區保險及退休金聯席主管夏哲偉及楊斌官，佢哋用「洗樓」形式逐層去到唔同部門，親手將iPod Touch送到每位員工手上，兼且勉勵一番。個個員工事前都毫不知情，所以見到兩位高層出現時都既驚且喜。
呢部iPod Touch非常珍貴，絲絲想喺街買都買唔到，因為每部iPod Touch背面都用雷射刻咗「1 Billion Milestone in 2010」（10億里程碑）及「ING Hong Kong Management」嘅字眼，又下載咗10分鐘打氣短片，意指今年公司要做到10億元新保費嘅目標。雖然今年剩番兩個幾月，但現時距離目標相差不足10%，極有機會達標，唔知到時ING保險又會送啲乜嘢畀同事呢？
余絲韻