絲絲講場：溫婉容復工好Relax
基金界女強人溫婉容（Eleanor）喺金融界退下火線，原來已經成16個月，早幾個月佢正式加入香港財務策劃師學會做行政總裁，佢話依家一星期返四日工，仲有時間享受生活。
財策師學會唔使跑數
Eleanor喺基金界打滾咗差唔多廿年，做過德盛安聯資產管理香港CEO，亦喺景順及法興等基金公司擔任過要職，上年話退休，都令絲絲有啲意外。尋日佢同絲絲分享心聲，話以前做嘢好忙，連同媽媽傾偈嘅時間都冇，加上患上坐骨神經痛，覺得個人要Relax吓，辭職後就利用年幾時間做自己喜歡做嘅嘢，包括讀中醫課程及打Golf等。依家雖然做番全職，但佢覺得財策師學會係非謀利機構，同以前要跑數嘅工作方式唔同，覺得份工好有意義。
改變攞CFP資格進程
加入財策師學會後，佢其中一個目標係改變攞CFP（認可財務策劃師）資格嘅進程，除咗終極嘅CFP資格外，可能會加入「中途資格」，畀啲本來已有財策經驗，但冇時間讀書嘅打工仔，一步步向CFP資格進發。
另外，財策師學會已向政府建議成立獨立嘅監管機構，專門監督來自銀行、保險公司及投資中介等投資產品嘅銷售過程，希望可以保障投資者利益。
余絲韻