市場熱線：工行有望接力炒上

市場瀰漫良好氣氛

就算話畀你知下個月會有股災，但散戶今個月可能仍會買股票，十月餘下時間真係唔憂冇消息炒，今日九龍塘賣地有望誕生新地王，聽日施政報告會貼錢畀人買樓，祖國就快公布九月同第三季經濟數據，花旗企業放榜，雖然冇寫包單一定係好消息，但孖屐氣氛好之時，壞消息都當好消息炒（例如上禮拜五）。

港股升幅收窄，主要係亞太區魚缸表現麻麻，東瀛休市，台灣同南韓倒跌收場，其餘亦只係微升，更顯得港股處於強勢。香港都算特殊case，屬於美金資產，但上市公司業務大部分喺祖國，而A股呢排翻生，更加火上加油。

滬綜指過咗2,700點，尋日再穿埋2,800點，隻安碩A50中國（02823）升幅仲勁過A股，溢價仍超過一成，係咪顯示滬綜指要見「3」字頭方休？

尋日港股升得勁嘅股都熟口熟面：煤炭股、石油股、貴賤金屬股，無非又係炒通脹預期同銀紙貶值，依家幾個主要貨幣都處於關鍵位：美匯指數77、歐元1.40、日圓82、澳元0.99，貨幣戰爭已經擺到明，而且唔係IMF同G20可以做「和事老」咁易解決，美國佬最叻嘅係將自己嘅風險轉嫁到其他地方。

恒指創咗雷曼爆煲以來嘅新高，其實好多股已返咗家鄉好耐，但係個別股仲好牛皮，所講嘅係大笨象（00005）、祖國移動（00941）、內房同內銀股等，後兩類股係政策拖累冇得好講，尋日有消息話四大國有錢莊要額外上繳存款準備金率半個百分點，今年祖國定下全年新增貸款目標係7.5萬億人仔，睇依家嘅走勢幾難達標。

恒指再升要靠內銀

內銀股弱勢有因，但恒指已升到23,000點樓上，要再挾上就需搵其他股接力，內銀股冇穿冇病，PE同PB都夠晒低，「接力賽」冇理由冇佢哋份。

金融股佔A、H股市值都好大，保險股已炒得差唔多，吼番市值大又落後嘅工商銀行（01398）係時候。高盛減持後依然硬淨，而且消除咗不明朗因素，當然最驚嘅係單邊加息（只加存款息、唔加貸款息），不過中央咁驚熱錢湧入炒高人仔，實施嘅機會好微，如果有官員出嚟澄清吓，內銀股一天都光晒。

戰報

連達科技（00889）+10%

古晨昨日指連達醞釀新業務發展，股價昨見上市新高2.26元，較即市低位2.04元升10.78%。

光大控股（00165）+9%

小尾上周四推介光控，指調整後將再展升浪，昨高見20.35元，較上周四日低位累升9.4%。

古勝