絲絲講場：大摩「盈」勢差唔請人？

近日環球股市升得唔錯，特別係新興市場就更可觀，絲絲以為呢個世界會好景咗，點知忽然傳出兩間大行要裁員凍薪，令人有啲錯愕。講緊嘅係摩根士丹利及美國銀行，據聞大摩決定喺今年底前凍結投資銀行部嘅職員編制；美銀仲慘情，計劃向全球銀行及市場部裁減約400名員工。

彭博社尋日都有報道呢單料，報道話大摩嘅投資銀行部門暫停招聘，但已排除年底前裁員嘅機會。大摩發言人Jim Wiggins拒評係咪凍結招聘新職位，淨係話有意為與花旗銀行合資嘅公司Morgan Stanley Smith Barney Unit招聘經紀職員。

有分析話，大摩凍結招聘員工反映以紐約為總部嘅投行來自交易及股票包銷收入縮減，可能令華爾街最大嘅5家投行錄得自○八年第四季金融海嘯以來嘅最低收入。

最近大摩嘅盈利預測不斷被調低，淨係過去兩周已有7名分析員調低大摩嘅第三季盈利預測。至於美國銀行就傳出裁減400名員工嘅消息；另外，巴克萊及瑞信亦已開始在歐洲裁員。

余絲韻

Money18新功能「18好路數」為你預測心水股票升跌機會率