絲絲發覺銀行界呢排唔興玩跨行「音樂椅」，而係轉咗場喺自己間行玩，繼滙控（00005）人事大變動之後，花旗香港尋日同絲絲講，佢哋一口氣委任咗三名總監，都係自己人，仲要三位高層都係女士，真係唔講得少。
絲絲打聽到，事緣係花旗香港環球個人銀行服務銷售及分銷業務總監蔡麗鳳（Amy）過檔廣東發展銀行，於是就由之前做財富管理業務總監嘅林素芬（Fanny）接棒，個職位名稱仲轉埋做環球個人銀行服務分行網絡業務總監。
至於Fanny個位，就由財富管理業務部投資產品及銷售部前主管李貴莊（Josephine）升任。
除咗兩位女士之外，花旗香港仲委任咗梁靜宜（Maria）做環球個人銀行服務花旗私人客戶業務總監。雖然Maria唔係內部調任，但其實佢以前都係花旗香港嘅人，今次都可算係返屋企。
香港呢邊高層大執位之餘，花旗與渣打一樣都睇好非洲及中國市場，佢哋仲開咗隊中國專隊，負責服務南非嘅中資客，一下子打盡兩大新興市場，真係高瞻遠矚。
余絲韻