港股經一輪衝鋒陷陣後，終作適度回調，但個股續有炒作。其中濱海投資（08035）自早前成功衝破0.5元這個橫行區間後，走勢漸見對辦，不妨趁勢吼位跟進。
事實上，濱海本身除具一定鑊氣外，其燃氣業務的發展勢頭一向唔錯。集團同中石油（00857）簽署二十年供氣合約，中石油由明年開始會向公司供應天然氣，為其發展秦皇島及周邊區域的燃氣業務。長年期的合作關係，唔單只有助濱海更穩定發展，亦證明集團係中石油重點關照的公司之一。況且，集團最近亦與天津鋼管簽訂天然氣銷售合同。因此，其股價近日才剛起航，呈圓底反彈之勢，短期應該仲有得升，目標睇0.7元。
跟手揀來走勢落後的水務股北控水務（00371）。其實今年以來，市場的確不乏調升水費的消息，可惜水務股每每都只係得一兩日貨仔，而且是次升浪中，水務股明顯落後。
當中，北控水務可睇高一線，皆因在眾多水務股中，集團的業務發展相對較快，今年上半年純利按年升2.5倍至1.448億元。此外，集團股價自於2.25元水平呈雙底反彈後，近日已反覆回升至2.6元，相信一旦突破，短期有勢見3元。
最後可留意亨得利（03389），縱然零售股開始有回吐，但相信黃金周一日未過，炒作亦未完。
濱海投資（08035）膽
目標價：0.7元
止蝕位：0.55元
戰鬥力：☆☆☆☆☆
北控水務（00371）膽
目標價：3元
止蝕位：2.45元
戰鬥力：☆☆☆☆
亨得利（03389）腳
目標價：4元
止蝕位：3.5元
戰鬥力：☆☆☆
帥哥