市場熱線：中國重汽做大做強

港股喺期指結算前夕有波動屬正常，整個九月份好友仍大獲全勝，主要係往績統計九月股市「瓜多過菜」，根據「相反理論」，所以股市反而挾上，仲有機會成為大蕭條以來升得最勁嘅九月份。不過，當問10個專家9個都睇好嘅時候，逆向思維可能又係反手沽空之時。

雖然話本地魚缸走勢靚絕，但升咁多唞吓氣亦好自然，下晝跌勢主要係跟住美股期貨，可能對晚上公布嘅花旗九月份消費者信心有啲擔心。

魚缸抽水活動頻繁

孖屐九月單邊升市只係選擇性放大好消息、忽略壞消息，不過，歐債第二輪風暴山雨欲來，愛爾蘭同葡萄牙嘅10年國債孳息已升至6厘半，淨係還息都好襟計，班歐洲佬享慣福亦懶理國家死活，睇怕歐債危機會變成「長命債長命還」。

九月升市抽走好多資金，呢排啲新股郁吓都超額過百倍，銀行門口啲招股書又好快派清光，好多公司亦乘機抽水，瑞年國際（02010）一個月兩度畀主要股東掟貨，尋日穿埋批股價，聯通（00762）發140億元CB，雖然話熱錢太多，但到下月尾AIA抽水千億之時，魚缸恐防都會乾塘。

各國無計可施，爭相為銀紙貶值去幫助出口，形成資源有價，鄧小平名言：「中東有石油，中國有稀土」，到今時今日卒之靠稀土取得話語權，提到「稀土」兩個字已變得炙手可熱，中鋁集團玩稀土帶挈埋個仔中鋁（02600）勁升，本身冇稀土礦嘅中國稀土（00769）一個月內升咗86%。

查實外國亦有稀土礦，之不過早年祖國用低價出口，外國索性向中國買稀土好過自己採礦，依家祖國突然限制出口搞到稀土變成稀有物品。

自舊年以來，祖國客車銷量增長一直好過商用車，不過兩大卡車生產商濰柴（02338）同中國重汽（03808）上半年成績表都相當對辦，但淨睇呢三個月走勢，濰柴由50蚊樓下升到82.45元，累升65%；重汽則由6.1元低位升至7.91元，升得三成唔夠，明顯跑輸一大截，吼落後股呢隻唔少得。

拓多種商用車市場

重汽中期每股賺0.3元人仔，通常上半年佔總銷量55%至60%，保守估計全年賺0.55元人仔，計落預測PE為12倍幾，相比其他車股雖然唔算特別平，但都叫做有吸引力。

間公司未來計仔多多，將同德國卡車製造公司MAN SE合作推出新卡車品牌，明年面世搶佔海外市場，今年亦先後買咗濟南豪沃客車同成都王牌商用車，由淨係造重卡車轉型到造多種商用車，濟南客車出年亦開始有盈利貢獻，實行多線發展。

古勝