絲絲講場：劉仲藜撐中投「外闖」有賺
規模有成三千億美元嘅中國主權財富基金中投公司，近排不斷遭到內地媒體批評，話佢「海外投資屢戰屢敗」。
絲絲尋日見到擔任中投獨立董事嘅劉仲藜，當然要問吓佢對呢啲批評嘅回應啦，劉仲藜就叫大家返去先仔細睇吓中投嘅年報，因為上面明明寫住舊年境外投資回報率接近一成二，呢啲要上報國務院嘅資料絕對係冇花冇假，最為真實可靠。
內地會計謀攻國際
老財長仲話，其實中投公司喺前年年底金融海嘯時期，趁機會喺海外執咗唔少平貨，作為「以盈利為目標嘅商業機構」，中投可以通過低買高賣賺番唔少。
劉仲藜以前做過中國財長，尋日係以中國註冊會計師協會會長嘅身份嚟香港，出席中國首家以聯繫成員形式組成嘅國際性會計師事務所組織網絡啟動儀式。
大家都知國際會計師事務所將內地市場視為兵家必爭之地，原來，內地同行一樣有開拓海外市場嘅宏願。
事實上，喺內地成立咗十七年嘅利安達會計師事務所，同其餘六間亞洲地區成員所簽約，尋日就喺香港正式啟動呢個網絡，除咗邀請劉仲藜出席之外，中國證監會前主席周道炯都有出席啟動儀式。
余絲韻