每個人都要讀書返學，估唔到連上市公司都話要升大學！話說早排先有「國際炒家」索羅斯入股嘅中國澱粉（03838），前日市場盛傳有股東配股沽貨套現，有中澱管理層朋友同絲絲講話今次其實係「中學升大學」，即係由以前嘅本土投資者，轉為更多國際專業投資者嘅機構股東為主咁話喎。
近排中國澱粉傳聞多多，但係前日就突然傳出，由上市前開始一直支持中國澱粉嘅老股東王瑞雲，突然將手上股份全部配售出去，中澱高層就同絲絲講，話晒公司依家都已經成長咗唔少，係時候由以往一間較本土化嘅公司，蛻變成一間更加國際化嘅公司，所以先有舊股東退出，換入一批更加國際化同專業嘅投資者。
中澱高層話，公司今次其實係「中學升大學」，好似讀書咁，中學同學係一班人，到咗升到大學，程度高咗，又會變成另一班程度更高嘅同學咁解。不過，讀完大學之後，唔知中澱仲使唔使讀埋個碩士同博士呢？
余絲韻