Vodafone（VOD）上個禮拜一口氣沽晒所持嘅500幾億元中移（00941）股份，搞到中移股價跌咗一輪，市場估計中移同VOD將會無偈傾，更加唔使望以後仲有咩合作。點知中移董事長王建宙近日響天津出席達沃斯論壇上講明，同VOD嘅合作無變，除咗合作開嘅漫遊業務同研發LTE手機之外，大家仲會共同開發綠色技術推廣添。
此外，王總仲首次回應VOD沽貨嘅行動，佢嘅睇法同好多證券行都一樣，之唔係可以幫助中移消除不明朗因素囉。講開又講，外電引述王總透露，中移最近響歐洲同VOD嘅行政總裁Vittorio Colao會面，但報道未有透露中移方面嘅代表係邊位，亦未有講會面係幾時，絲絲好想知道，雙方嘅會面究竟係VOD沽貨前定後，還是中移一齊參與整個配售過程呢？
余絲韻